Новости

Бу күннэргэ

Үгүс оҕону бүөбэйдээн

Кичэйэн үөрэтэн таһаардыҥ

Билиигэ-көрүүгэ уһуйан

Кэрээтэн кэрэҕэ сирдээтиҥ.

Эн биэрбит билиигэр бигэнэн

Үөрэхтээх дьон буолан таҕыстыбыт,

Эн сырдык кыһаҕар саҕалаан

Үтүө дьон биһиги буоллубут.

Биһиги билиибит кыһата,

Тапталлаах оскуолабыт,

Баһыыба эйиэхэ!

            50 сыл-үйэ аҥаара, халлаан куйаарыгар чыпчылҕан түгэнэ, киһи олоҕор балачча уһун быһаарыылаах кэм.

Балаҕан ыйын 16 күнүгэр Саха саарына, профессор Г.П.Башарин аатынан Сылаҥ орто оскуолатын 2-с выпустара (1967 с) оскуола аанын сэгэтэн, истиҥ көрсүһүү түгэнин бэлэх ууннулар. Бу күн үбүлүөйдээх выпустар “Ахтар-саныыр билиибит кыһата” кинигэни үөрэнээччилэр, учууталлар, ыалдьыттар ортолоругар сүрэхтээтилэр.  Хомуурунньук бииргэ үөрэммиттэргэ, кинилэр дьиэ-кэргэттэригэр, оҕолоругар, сиэннэригэр ананар. Кинигэ киирии тылыгар: « 1967 сыллаахха оскуоланы бүтэрэн олох киэҥ аартыгар тахсан, идэ-үлэ булунан, тус олохпутун оҥостон,оҕо-уруу төрөтөн, иитэн-үөрэттэрэн олох суолун булларан, хайы-үйэ сааһыра барбыт дьон үбүлүөйдээх сылбытын көрсөбүт. Бүгүн биһиги ортобутугар бааллар биллиилээх архитектор- Иван Андросов, бочуоттаах үлэһиттэр –тутааччы  Александр Афанасьев, ветврач-педагог Екатерина Попова, транспорт үлэһитэ Егор Попов, үлэ туйгуннара-учууталлар Матрена Дьячковская, Анна Макарова,эмчит Наталья Андросова, иитээччи Любовь Пестрякова уо.д.а» Ити курдук, биир-биир бэйэлэрин билиһиннэрэннэр, кинигэ ис тутулун, билиҥҥи кэмҥэ суолтатын, кэнчээри ыччакка холобур буоларын эттилэр, санааларын үллэһиннилэр. Бэчээккэ Попова Екатерина Семеновна, Санникова Июлина Никитична бэлэмнээбиттэр.  Оччотооҕу оскуола чаҕыл күннэрин ахтар-саныыр сырдык күн ааста.

 

Балаҕан ыйын 19 күнэ-  Чурапчы улууһугар, Саха Өрөспүүбүлүкэтигэр кутурҕан күн.  Тус хоту күүс өттүнэн көһөрүү-бу саха норуотугар хара мэҥ, төһө да кэм, сыл-хонук  аастар аһыыта сүппэт, сүрэххэ сөҥмүт курус санаа...

Быйыл 2017 сыл- Чурапчыбыт улууһугар История сылынан биллэриллэн, дойду устуоруйатыгар бэлиэ түгэннэри, өйдөбүнньүк бэлиэлэри туруоруу, саҥардыы, үйэтитэр сыаллаах үлэлэлр киэҥ далааһыннаахтык ыытыллаллар.  Быйыл Көһөрүллүү 75 сылын кэриэстээн эдэриттэн аҕам саастаах ытык дьоммутугар тиийэ өйгө-санааҕа хаалар тэрээһиннэр буоллулар. Көһөрүллүү декадатын чэрчитинэн биһиги оскуолабытыгар, нэһилиэкпитигэр бу атааннаах дьаһалга кыттыбыт, биһиги ортобутугар күн бүгүн кэнчээри ыччакка кэс тылларын этэр Көһөрүллүү кыттыылаахтара кыттыыны ыллылар. Кинилэр төһө да ахсаннарынан аҕыйааталлар биһиги дууһабытыгар олус чугастар, күндүлэр.  Балаҕан ыйын 20 күнүгэр саха саарына, профессор Г.П.Башарин аатынан Сылаҥ орто оскуолатыгар “Ахтар-саныыр иэстээхпит”  диэн истиҥ көрсүһүүгэ  Көһөрүллүү кыттыылааҕа, нэһилиэкпит Ытык кырдьаҕаһа  Дьяконова П.В кыыһынаан Мотрена Петровналыын кыттыыны ыллылар. Пелагея Васильевна төһө да сааһырдар, күн-дьыл өксүөнүн,  оччотооҕу аас-туор олоҕу этинэн-хаанынан билбитин иһин,хоп курдук хааман тиргиллэ, кэлэ-бара сылдьарын  сөҕө, бэркиһии көрөбүт. Балаҕан ыйын 21 күнүгэр нэһилиэккэ кэриэстэбил күнүн  бары тэрилтэ үлэһиттэрэ, үөрэнээччилэрэ кулууп дьиэҕэ мустан бэлиэтээтибит. Бу күн оскуола үөрэнээччилэрэ  «Оонньооботох оҕо саас» диэн  литературнай дьүһүйүүнү туруоран дьон-сэргэ киэҥ сэҥээриитин ыллылар. Көһөрүү ыар сылларыгар кырачаан оҕолор эрэйи-муҥу көрөн, ыалдьан, тоҥон-хоргуйан ыарахан кэми тулуйбуттарын оҕо хараҕынан итэҕэтиилээхтик көрдөрдүлэр. 4 кылаас хорсун-хоодуот уолаттара андаҕар, кэс тыл этиллэр суолталаах хоһоон этэн чоргуйдулар, кылыһахтаах куоластаах фольклорнай бөлөх ыллам ырыаны бэлэх ууннулар. Маны сэргэ, «Көһөрүллүү суолунан айан»  диэн бу күһүн Көһөрүү буолбут миэстэлэринэн айаннаабыт биир дойдулаахтарбыт айаннарын-сырыыларын туһунан оскуолабыт музейын директора, элбэх кинигэ автора Макарова К.Г.уонна “Сулусчаан” уһуйаан үлэһитэ,хоту  Быков Мыс нэһилиэгиттэн төрүттээх Платонова С.Н. хаартысканан  иһитиннэрии оҥордулар, история омоон суолун айанын сырдаттылар. Маннык тэрээһиннэр дьиҥ-чахчы итэҕэтиилээхтэр, иитэр-үөрэтэр суолталара үрдүк, кэнчээри ыччакка үтүө холобур быһыытынан сыаналанар.

Макарова В.С., Сылаҥ орто оскуолата