Новости

Ыччаты угуйаары-сонуннук, олоҥхоҕо уһуйаары-сонуннук

Философскай наука кандидата, олоҥхо куруһуогун тэрийээччитэ, учуутал, буойун Дмитрий Степанович Макаров 100 сааһын бэлиэтээһин чэрчитинэн ыытыллар өрөспүүбүлүкэтээҕи Олоҥхо киэҥ киэлитигэр методическай семинар бу ый алтынньы 11 күнүгэр киэҥ далааһыннаахтык буолан ааста. Методическай семинар ааптара оскуолабыт саха тылын, литературатын учуутала, СР президенин гранын, СР вице-президенин За вклад в развитие республики үрүҥ көмүс бэлиэ хаһаайката, улуустааҕы Эрилик Эристиин бириэмийэ лауреата, СР үөрэҕириитин туйгуна, РФ уопсай үөрэхтээһинин Бочуоттаах үлэһитэ, методист-учуутал Сивцева Лидия Степановна. Бу күн учуутал , саха оҕотун олонхоҕо уһуйар уопутун тарҕатар күнүгэр, ыаллыы сытар Ытык Таатта, Мэҥэ-Хаҥалас уонна Дьокуускай куораттан, Чурапчыбыт улууһун төрөөбүт тыл учууталлара,  олоҥхоҕо туһаайан айа-тута, үлэлии сылдьар ыалдьыттар кэллилэр. Ол курдук, Өксөкүлээх Өлөксөй аат.Норуоттар доҕордоһууларын дьиэтин СӨ норуоттарын култуурунай нэһилиэстибэлэрин Киинин сүрүннүүр специалиһа Сысолятина З.Г., С.Н.Донской -II аатынан  Үөрэҕи сайыннарар уонна Идэни үрдэтэр институт нуучча уонна саха тылларын кафедратын ст.преподавателэ Ф.В.Ядрихинская, Донской -II аатынан  Үөрэҕи сайыннарар уонна Идэни үрдэтэр институт кафедратын доцена В.В.Аммосова, “Олоҥхо ассоциацията” өрөспүүбүлүкэтээҕи общественнай тэрилтэ президенэ Ф.В.Шишигина, Мэҥэ-Хаҥаластааҕы Олоҥхо дьиэтин дириэктэрэ Е.Н.Иванова, СӨ норуоттарын култуурунай нэһилиэстибэлэрин Киинин специалиһа У.М.Флегонтова,Е.Н.Флегонтова бүгүҥҥү күнү сыныйан сыаналаатылар, төгүрүк остуолу иилээн-саҕалаан ыыттылар.

Лидия Степановна, 2005 сылтан саха оҕотун олоҥхоҕо уһуйар, такайар ньыматын, сатабылларын көрдөрөр  аһаҕас дьарыктары тэрийэн, уһуйаан-оскуола-нэһилиэк биир санаанан салайтаран үлэлии олороллорун үлэтинэн итэҕэттэ, дьон-сэргэ сэҥээриитин ылла. Күн иаҥнайгы аҥарыгар А.А.Сивцев аатынан Сылаҥнааҕы сынньалаҥ кииҥҥэ “Сылаҥҥа олоҥхо эйгэтэ” диэн ис хоһоонноох үлэни түмэн көрдөрөр театральнай композиция, “Алаһа” балаҕаҥҥа норуот маастардара Ф.К.Горохова, А.Н.Никитина олоҥхо кэрэтин хоһуйар быыстапкалара сэлэлии тардылынна, бэтэрээннэр түмсүүлэрин салайааччыта К.В.Макарова олоҥхо иһитин-хомуоһун ымпыктаан-чымпыктаан кэпсээтэ. Күн иккис аҥара оскуола музейыгар экскурсияттан саҕаланна. Музей директора К.Г.Макарова олоҥхо куруһуогун тэрийээччитэ Д.С.Макаров олоҕун сырдатар быыстапканы тэрийдэ. Салҕыы оскуолаҕа үөрэҕи таһынан эбии дьарык тэрийэр учууталлар олоҥхоҕо программаларын, үлэлэрин сырдаттылар. Ол кэннэ, Өксөкүлээх Өлөксөй аат.Норуоттар доҕордоһууларын дьиэтин СӨ норуоттарын култуурунай нэһилиэстибэлэрин Киинин сүрүннүүр специалиһа Сысолятина З.Г.төгүрүк остуолу салайан ыытта, Өрөспүүбүлүкэҕэ олоҥхо хамсааһынын, инники былааннарын иһитиннэрдэ. Бу курдук, хорутуулаах үлэ күнэ түмүктэнэн, кэлбит ыалдьыттар бука бары, тустаах үлэлэригэр баай уопуту, саҥалыы санааны ылынан тарҕастылар.

 

 

 

Макарова В.С.